| man62's profile✿◕‿◕✿ ╬ M@M WorKsHop ╬PhotosBlogLists |  Tools  Help |
|
✿◕‿◕✿ ╬ M@M WorKsHop ╬♬ 別讓寂寞害你傷得一夜白頭，贏得不需要的自由，和最耀眼傷口 ♬ November 02 搬遷啟示October 10 好彩、好彩呢個月對我嚟講真係起伏得好大，單單係我架車，已經前後左右全部撞晒，咁樣仲唔同d衰野講拜拜﹗
但係撞咗4次車，對於我嚟講真係學到好多野，尤其係早幾日，無端端比個鬼佬坐落嚟我架車度，架車竟然凹咗﹗因為得我一個人，嗰一剎那我唔知點算好，響我附近一班菲律賓人，即時打眼識叫我去追個鬼佬，最後竟然比我追到，仲有叫佢賠埋錢，雖然賠咗錢，但係望到架車凹咗，當然好唔開心，兼且慨嘆自己真係黑仔，而身旁既小子洋竟然講咗一句：「嘩，比你追到個鬼佬，賠埋錢，你仲叫黑﹗」係喎，好彩事發時我響架車裡面睇到，好彩我追到個鬼佬，好彩佢企定定比我捉，好彩佢冇入到酒吧，好彩佢老婆肯比錢，好彩整返都唔係好彩，諗諗下，真係好彩喎﹗其實我仲響度怨乜呢﹗
除咗要多謝小子洋既逆時考令我開心番之外，就係嗰班菲律賓人，佢地真係好好，係咁叫我追個鬼佬，又肯同我做人証，相反其他香港人，一知我報咗警，即時雞飛狗走，真係好感激佢地，雖然素未謀面，但係比咗我好大既支持，真係好感動﹗我突然間覺得自己好溫暖。 September 23 下一站元朗 呢兩日過得的確充實，前晚有人又玩「鬥大」遊戲，搞到全城興奮，於是收咗工11點幾，同輝爺揸咗駕車入元朗，而傻強就一個人揸電單車入去，原本諗住大家「劈住」入去，點知有人唔識路，所以變咗慢慢入去。入去做咩？當然係搵身處元朗而又放假既啫哥食B仔涼粉啦﹗數下數下，已經有5、6年冇去過B仔，於是我地4個人就叫咗一個B仔涼粉、一碗芒果河粉大家share，而家既B仔涼粉加咗好多無謂既生果落去，好似大樹菠蘿、木瓜同香蕉，真係有少少九唔搭八，不過嗰個芒果河粉的確幾得意，食落去真係好似河粉，但實際上又唔係河粉，輝爺估計可能係椰子肉﹗最後4個人都食唔晒兩碗野，仲話食榴槤班戟，真係失望......，不過，話晒係陀地既啫哥就出錢請我地食糖水，真係唔話得。食飽野，有人話要去大霧山睇賽車，又有人話捉得好勁，於是，就繼北角Morning K之後又一巨獻，就係走咗去元朗間Neway唱K，講出嚟都笑死人，住柴灣要走到去元朗唱K，唱到5點鐘走人時，輝爺就話好似唔多夠喉，我都覺得好似冇乜歌唱過，可能因為我地太夜去既關係啦，下次咪再搵個更加隔涉既地方試下唱囉﹗哈哈哈
 噚日放假，約咗馬屎去佐敦食我最愛既澳洲牛奶，但係噚日既炒蛋味道就嘛嘛，連杯凍奶茶都係一樣，令人有少少失望，不過最開心都係馬屎買咗件麥當娜日本演唱會Tee比我，等我可以出去威下﹗夜晚就約咗傑仔去睇舞台劇《empty》，由於係佢由負責海報攝影既關係，所以佢都幫人地sell得好熱烈，而更因為佢既關係每次都係坐正中間位，正到爆﹗噚晚套劇我覺得好睇過之前套《攣到爆》，悶場比較少，而且《empty》裡面好多位，都係好沉重去講及人生既問題，以前既我好鐘意睇呢種劇本，但係而家就會覺得太灰，佢地睇到呢個世界太灰喇﹗不過佢就帶出咗一樣野，無論個世界點灰都好，你既遭遇點坎坷都好，總可以搵到一個理由，讓自己生存落去﹗September 15 開心過山車噚日的確係一個思潮起伏的日子，全日的思緒起伏都好大，一D事會令到我好開心，但即時又會有一D野發生即你打沉，情況就好似坐過山車一樣。
想見的人，終於見到，不過只係電話傾偈，唔知係佢工作壓力大定係其他原因，呢期佢都顯得神神化化，情緒比我更加厲害，所以講講下電話就無端端收咗線，雖然近在咫尺，但係大家都冇坐低慢慢傾既衝動，等咗兩個幾鐘頭，佢先走過嚟同我講咗一句野，原本佢想同我傾多幾句，但可惜嗰個時候我又要走。我成日都會覺得，同呢個人響錯誤既時空相遇，由開始既一刻係錯，接下嚟既日子都係錯，大家搵唔到一個中間點，我只好應命啦﹗
夜晚要去到尖沙咀做野，因為對個SHOW沒有興趣的關係，就響間吧門口呆企，突然望到對面酒店有一班人行出來，行蹤古怪，望真D，點解咁熟口面既，再行近少少望，我成個心都跳咗出嚟，原來係我既超級愛人張震震，同佢既Free Night樂隊仲有MC Hotdog，嘩，真係人都顛呀，我即時同佢地揮手打招呼，原來佢地響隔離間酒吧做SHOW，講出嚟真係失禮死人，連佢嚟咗香港都唔知，於是就拉人衫尾入咗隔離間吧，原本真係好想睇，但諗下諗下都係做野緊要D，見咗佢兩面，已經好開心，所以又要死返過去繼續做野，但全程都係望住隔離酒吧，真係慘，有D野比你遇到，但係得唔到既感覺真係好爛﹗但諗深一層，呢程過山車，係開心係多過唔開心既﹗
纏擾咗3個幾月既事終於解決咗，原因因為鬧交開始，最後都係用鬧交嚟解決，但係有一樣野好奇怪，其實我都有諗過噚日就解決呢個問題，我只係心想，但係個機會竟然即時出現，有人好似睇穿我個心，幫我做咗一D野，令到個機會出現咗，加上旁邊兩位人兄既協助，再加埋自己既勇氣，最後就將個問題解決咗，我真係好開心，好感謝上天比我呢個機會﹗好感謝嗰個睇穿我個心既人﹗好感謝響我身邊煽風點火既人﹗無言感激﹗ September 09 從前的人噚晚發咗個夢，見到從前既好朋友，一個已經好耐冇搵既朋友，亦都係從來冇發夢見過既朋友，詳細既內容真係唔記得，但就記得我同佢食飯，期間傾偈傾咗好耐，之後大家各自走之類，夢醒既一刻的感覺唔係太好，一個咁耐冇見既人，亦都冇諗起既人，突然間發夢見到，除非個人死咗架啫﹗
醒咗之後，同事同我講，日前有個行家死咗，但係唔知係邊個，我聽到真係有少少驚，於是我就試下打佢上次比我個電話，電話真係通，亦都係佢聽，第一下我唔識反應，呆咗兩秒，我終於出聲，第一句就係：「你未死呀﹗」佢冇問過我係邊個，原來佢仲記得我把聲，佢覺得我呢個問題好神奇，於是我就將我發夢既事話咗比佢知，佢一邊聽，一邊不停笑，咁耐冇搵，當然吹返幾句，亦知道佢好多近況，原來佢而家搞緊生意，仲約咗下個星期食飯tim，雖然知道佢約我或者我會出去既機會都唔大，但又有乜所謂呢，最緊要我都係想知道呢個人仲係咪響呢個世界上面啫。
收線之後我響度諗，咁大個人終於生性，去學野，去搞生意，作為前度朋友，亦都覺得好安慰，人......其實真係會變架，只不過係要幾耐時間啫﹗不過，有邊個可以放咁多時間去等呢﹗ September 06 投資一個好女人今日收到一封名為「投資一個好女人」的Email 其實投資女人是最划算的，尤其是投資一個好女人，有這樣經歷的男人一定會同意我的看法。女人是奇妙的生物，當你真心打動她之後，她就會不斷地為你付出，直到終老一生。 當我看到這封Email其中一句「儘力去做到你給她的夢」，我突然間醒起張學友跟梅艷芳合唱的《相愛很難》最後一句：「無論熱戀中失戀中 都永遠記住第一戒 別要張開雙眼 」其實我一直都唔明呢句歌詞講乜，但係睇完呢個Email之後，我好似完全明白晒﹗ September 03 最難過的農曆七月每年一到咗農曆七月我就會好「淆底」，因為冇人知呢個月會發生乜野事，最可怕就係今年係潤七月，換句話講，即係有兩個七月十四，即係呢兩個月，大班大哥大姐可以打橫行，之前，好順利咁過咗第一個七月十四，完全風平浪靜，冇乜特別事情發生，但係之後竟然......
成組人都唔知發生乜事，首先一個比人偷車、我比人撞車、另一個又入醫院......多到我都唔知點講，早兩日雖然開六點，但係一開工就一直響醫院，因為同我開工既同事一出嚟又話隻眼睇野好浮、頭又拮住痛，最恐怖就係係咁嘔，唔帶佢睇醫生都唔得，佢係咁叫我走先，我點會忍心見到佢咁呀，最後轉咗第二間醫院留院，到凌晨十二點幾先走，其間電話講過唔停，因為其中一個同事「撞野」情況越嚟越嚴重，講完兩個電話又要返醫院睇下個病人，擔心佢唔知會唔會無端端暈低，夜晚半夜又要幫佢返公司拎Cliam保險的單，夜晚返到屋企同事又同我講，有野講比我知，我一定好興，原來有個舊同事響出面係咁講我是非，傻仔，我點會「慶」，呢D人響我心目中一D地位都冇，佢講乜都唔會影響到我，所以我唔會理佢，由佢自己響度發花顛，最後講到四點先收線。
第二朝原本要早少少趕去醫院，點知十一點幾先醒，爬起身即時飛車去醫院，可惜醫生都係走咗，唔可以即時簽咗張Cliam Form，唯有接個同事出院，之後又要去阿媽檔口招呼另一位「撞野」同事，搞下搞下，夜晚六點又要開工，原本想眠一眠都唔得，一出街開工就即時頭痛，又要比個星玩足三粒鐘都唔緊要，仲要食白果，嗰一刻真係覺得好辛苦，唔係肉體上既辛苦，而係筋疲力竭、心力絞碎嗰種辛苦，今日再唔放假，我驚我真係會死﹗
我諗，今年既農曆七月，暫時嚟講係最難過既一年﹗ August 27 人生的創舉 噚晚我同埋兩條謀李，做咗一個人生創舉，就係凌晨03:00鐘收工之後，去咗唱K，明明眼瞓到死既我，因為唔抵得有人經常「大」人，所以就捨命陪君子，齊齊走去唱K，明知只可以唱到05:30，但仍然照唱可也﹗得兩個鐘唱得咩出樣，到咗05:00有個侍應走入嚟，問我地有冇興趣唱morning K，每位只需 $18，如果要食早餐只需加多 $5，可以唱到早上09:00，嘩，咁平，反正橫死掂死，加埋一都係25蚊，抵到咁冇理由唔唱架﹗於是我地各人都叫咗一份早餐，見佢兩條謀李一邊飲啤酒，一邊食早餐，我真係覺得好笑喎。最後就唱到朝早07:30先走，走既時候見到個天光晒，嗰一刻即時有種想嘔既感覺，似好飲咗好多酒既感覺一樣，好難頂﹗雖然真係抵到爛，但係呢D野，試一次已經夠晒﹗況且優惠只係到8月31號。今日就瞓到4點先願起身，真係勁，夜晚未夠七點又約咗明仔去食Shooters 52，剛剛先食完個通粉既我，當然係乜都食唔到我最愛既羊扒，真係覺得可惜......
今日又收到我偶像Cyril既新魔術，真係好勁，好勁同好勁，真係越嚟越鍾意佢呀﹗如果想睇就去我個Blog裡面既「Cyril Magic」度睇啦。 August 19 不幸中之大幸唔知係咪呢期近得地嶽黑仔王多，D黑氣全部過晒嚟我部，噚晚個心口極度唔舒服，今朝一出去，連工都未開就撞車，不過今次係比的士佬撞，嗰下撞擊力好似拍戲一樣，架車個櫃既野飛晒出嚟，輝朱同我即時落車，的士佬冇發老脾，反而好好聲氣，認自己唔啱，亦都願意賠償，於是就抄低佢既資料然後走人﹗我架車撞毀程度都唔係算太嚴重，只係要搵咗條揼把，個人就冇乜事，可算係不幸中之大幸，真係要感謝上天。
呢幾日都有D神不守舍，今日有人響我面前突然間講起「傾天光」三隻字，我又響度諗，己經有幾耐冇同人傾天光呢？我都唔記得，好似好耐，上一次拎住個電話睇天光，相信係一年前，一個好重要既電話，突然間勾起我潛意識裡面一D回憶，一D我好似已經忘記咗既記憶，諗下諗下，然後就響個心笑咗出嚟，但係嗰位人兄就同我講「Forget it la﹗」Forget？No La，一D開心既回憶做咩要Forget佢呢，一個人有開心同唔開心，人生先至完美嘛，加上我個人比較灰，所以好少會記得開心既野，難得比我記得起，我覺得我要好好回味一下﹗ August 18 好耐冇見﹗噚晚收工，約咗一個經常見，但係又好耐冇坐低傾偈既人飲野，雖然前半部份發生咗少少事，令到我唔係太高興，不過原本應該係黑面既我，竟然由心裡面笑咗出嚟，唔敢講呢種係咪苦笑，但我笑既係，我真係變咗，換轉以前既我，已經「立」袋走咗去，不過我冇，我好慶幸我冇咁做，因為咁做太過任性喇，我唔係呢種人﹗
同佢傾咗好多好多野，工作、生活等等等等，識咗咁耐，我好似好少同佢講咁多野，呢幾年更加冇乜點聯絡，從來響佢面前我只係會發脾氣﹗講下講下，我就第一次將我心裡面既野全部講晒比佢知，仲有一D唔係太應該比佢知既野，呢樣野我的確忍咗好耐，講咗出嚟都可以叫做舒一口氣，講完佢都好似好明白我既苦況，之後講每一樣野，我都睇得出係為我好，雖然把口不停話我唔好，做得唔啱，但係我知道佢真係好關心我，只不過用既方式有D唔同﹗
今朝訓醒，我突然間諗起，咁多年嚟，我係知道佢既野，但係好似從來都唔了解佢，所以今日打比佢，但係佢好似好忙，把聲有少少唔開心，我唔知咩事，亦都冇問，唔想問得太多，搞到自己亂諗野，知道佢做野好辛苦，真係好想幫佢，但係好似有D力有不遞。
以前，我會覺得佢對我好係利用我，另一邊既自己又會諗，唔係既，佢唔係一個咁既人，其實呢個問題，到咗呢一刻，我都搵唔到答案答自己。係利用咁又點，有價值先會比人利用，不過對住佢我真係唔識形容，唔可以講係好開心，但係總係有D與別不用，佢對住我既方式，係我身邊既人從來都唔會咁對我﹗由今日開始，我希望盡我既能力去珍惜、了解呢個好特別既朋友﹗
同時亦都好感激一直都好撐我既細佬，如果唔係佢，噚晚我都唔知點樣撐落去。 August 05 What Do U Want ?呢幾日又開始發作，我開始捉到自己個 pattern，每次受到連繼既嘈音騷擾，覺得不受尊重，心情定必差到爆，自問我既「制」唔係太多，但係都有唔少，以上兩個「制」係必中﹗而幾日亦都有人將呢個「制」禁著咗﹗恭喜晒﹗閣下中咗獎喇﹗
唔開心最好就係搵人傾，不過好可惜，我今晚搵錯咗對手，搞到自己梗加唔開心﹗仲要問我：「What Do U Want？」呢句說話真係經典，我都想知，我既答案只有：「冇野想，只係想搵人傾下偈，想自己開心D﹗」呢個世界上，唔係你想同人傾偈人地就會同你傾，肯同你傾，但係不停敷衍你，又或者乜都冇意見，其實都幾失敗，「失敗」我係指自己，因為揀錯咗對手，同人地表錯情冇乜分別﹗唯一分別就係前者既「失敗」，係響個心裡面，後者，就係表面上既野﹗算啦......我相信唔諗咁多，做人會開心D﹗﹗﹗
30歲，人生既路都叫行咗一半，但係身邊比我大既人總係好似小朋友咁，永遠都長唔大，仲玩緊一D小朋友既玩意，令到夾咗響中間既我覺得好辛苦，點解會咁架﹗點先可以平衡到呢？我好希望可以搵到一個方法，再落去，我諗我好快就會支持唔住﹗  August 04 New Face個幾星期冇過個Blog，一開，真係差D嚇襯，個Blog然換咗新面貌，有部份既顏色無端端唔同晒，又要我再執過，後來又發現之前寫既日記D位都亂晒，真係激死﹗
除咗個Blog唔同咗之外，連公司都唔同咗，搬咗新公司已經一個月，不過等到今日先至叫做等齊人，可以響新公司舉行呢個入伙Party﹗「飲食組組長」Peggy當然唔會待薄各位，一早已經買定一籮野食，當中包括4個系列：
 1. 日式系列：各款壽司、冷麵、蟹子沙律、烏冬、生蝦、凍蟹 2. 滷水系列：冇大長桿菌既豬大腸、滷水鵝、豆腐、鵝片、蛋、豬頸肉、雞翼 3. 上海系列：小籠包、窩貼、生煎包、春巻 4. 甜品系列：生果、糯米糍、鮮果沙律仲有特別客串既串燒同三文治，原本諗住帶個吉肚返去可以食多d，點知食幾食就胃痛，真係無福消壽﹗今日如果唔返公司，都唔知道原來我地真係好多人，不過平時真係唔係咁覺﹗
 呢兩日打風，今日出到街，風勢強勁，好多山路都封咗，因為有好多樹被吹倒，完全好似8號風球一樣，好多人都質疑天文台點解唔掛8號風球，係咪因為D學生唔洗返學，同埋要睇住個股市呢，真係不得而知﹗ July 22 考試順利過關喇﹗﹗﹗今晚執相又執到兩點幾，搞幾搞，望下個鐘原來又 3:00，今日唔知發生乜事，個MSN冇人，星期五啫，個個都唔知去咗邊，做緊野既時候冇人叫我，真係落得清閒，但係做完野個LIST又冇人，真係有少少失落﹗可能慣咗每一晚都有人煩我掛，人真係犯賤﹗ 呢幾日真係忙到要死，日日放工返到屋企，都仲係咁做，所做既全部都係收相，揀相，同執相，呢幾個環節聽起嚟好似好簡單，但往往都要搞上我幾粒鐘，根本連乜稿都寫唔到，加上本人今日要考試，乜書都冇溫過，完全考天才，前晚執相執到 2:30 ，書都冇掂過，仲差一篇碟評都未寫，莫講話星期日嗰段名人雜誌，好彩米雪媽媽幫我頂咗 1200字，真係唔話得，有時間一定會請佢食飯﹗
 今日下午起身之後，就同幾個同學出咗去溫書，不過溫咗幾個鐘都唔知自己響度做咩﹗望下隻錶已經 5:30，7:00要考試，於是係咁叫自己回魂﹗好彩叫咗幾次個靈魂都返咗嚟，作出最後衝刺。開始考既時候心情真係極之緊張，自已衰都唔想累死人，但後來就覺得唔得咪下次再考囉﹗抱住呢個心態的確係好好多，加上我覺得 Keith To 完全係明益我精選，佢問既問題真係難，但答案其實好簡單，佢完全冇留難我，都算係咁啦，所以最終當然就係順利冇阻啦﹗哈哈，真係要多得我嗰班咁神心既同學。呢個 Master Hypnotherapist 課程讀咗年幾，呢個考試差唔多折磨咗我兩個月，雖然今次考試順利過關，但係仲未拎得CERT，事關本人都仲未交功課，限期係年底，唔知我有冇咁既時間去完成佢呢﹗做又冇心機，唔做又白費心機，人生原來真係充滿矛盾﹗ July 18 Phantom of the Opera中天使的秘密 等咗咁耐，終於等到噚晚去睇 Phantom of the Opera，$800一張飛，真係好貴，咁大個女都未睇過咁貴既Show，但睇完之後覺得真係物超所值﹗之前完全唔知個故事大綱，只知道最震撼係盞幾十磅既水晶吊燈會跌落嚟，於是響小霸王媽媽既安排下，我就坐咗響盞水晶燈既下面，即係頭十行既位置，但由於本人既英文極差，所以不時要扭頭睇字幕，唔係完全唔知佢講乜，就因為扭嚟扭去，最後搞到頭痛，真吹脹。
 雖然個個都話水晶燈跌落嚟嗰幕好震撼，但本人就覺得麻麻，因為佢地會有心理準備比你知道幾時跌，加上跌得太慢，所以唔係太驚，反而Opening時，盞吊燈由台升到天花板嗰下，加埋恐怖既音樂，我覺得係更加震撼，絕對令人有種驚既感覺。另外，在劇中看到一句對白「天使的秘密」，其實看過這個劇的人，都會發現內裡有得多秘密，一定會有很多疑團，包括隻船點可以響個台度行，個男主角響條橋跳咗落嚟之後去咗邊，Phantom明明坐響張櫈度又突然蹤，千千萬萬個問題，真係令到人好想再睇多次，不過經冇呢個機會......係可能要等數年後，真係可惜﹗ July 16 06@japan2返咗香港一個星期，日日都忙到爆，直到今日先叫做得閒少少，先可以寫下bolg，同大家分享下今次日本之旅既經歷。
Day 1：
 今次同米雪及明仔分開飛機坐，由於大家只係差1個鐘，所以就約埋一齊去機場，一齊食早餐，而富有既米雪媽媽就食咗個史上最貴成$38 既「王府」雲吞麵，而我同明仔呢D咁窮既，就食咗個糯米雞同漢堡飽。米雪同明仔起飛後，就輪到我，但飛機起飛前三個字，突然橫風橫雨，又出埋紅色暴雨警告，嗰一野真係嚇一嚇，最後遲咗半個鐘都叫做成功起飛。上到飛機瞓咗一陣又食野，日航個飛機餐都唔錯，又沙律又甜品，方死你唔飽咁，不過總叫好食過 CX ﹗雖然飛機都叫飛得好定，但係就唔係點瞓到，所以不停望住飛機下面既雲，望望下，發現下面有好大個島，一望之下，原來係我好想去既沖澠島，嘩，真係好正呀，希望下年可以去到啦﹗臨飛之前，明仔就遞咗個手提電話比我，叫我出閘搵佢地，好在呢個電話，救咗我一命，事關原來本人坐既名牌日航航空，同佢地坐既西北航空唔同機場，我一落機勁搵兩條謀李搵唔到，於是就打比米雪，佢係咁問我係咪成田機場，又叫我唔洗驚﹗驚，我唔驚，有錢洗乜驚呀﹗原來佢地響 2 號機場，而我就響 1號，最後米雪同明仔就坐巴士嚟同我會合，真係不幸中既大幸﹗
坐巴士去到酒店，呢頭放低行李，嗰頭已經落街博殺，由於米雪約咗朋友既關係，所以就去咗酒店隔離既東武百貨，勁行，咁就開始咗我地博殺之旅﹗食飽飯返酒店，去咗樓上搵我地另外幾位團友，唔上由自可，一上真係不得了，幾位好客既朋友，將響日本十幾日既戰利品攤晒出嚟比我地欣賞，睇完之後，米雪即時多咗幾個 Idea，我指係行街既 Idea ﹗
Day 2：
 十點鐘起身食完個早餐，即時跑咗去 01 City，明仔同米雪就勁掃 Tsumori 既銀包同手袋，而我就周圍行下，因為都冇乜野啱我﹗之後又去咗 Parco行，明仔同米雪都大有收穫，而我都只係買咗一件衫同埋一件泳衣，準備第二日既溫泉之旅。之後又落咗新宿既高島屋，食我最喜愛既炸豬扒飯，五條友，見難得有機會，所以個個都叫咗最大份既豬扒嚟食﹗真係好好味呀﹗ 每晚食飽飯所有百貨公司都已經閂晒，所以我地既活動就係夾公仔，夾公仔同夾公仔，大家都夾到顛咗，明仔一邊夾把 Kitty ，一邊黑晒面，而且身體同面容都跟住扭曲，睇到都覺得好好笑﹗仲要今次之行，最勁就係夾到三隻怪誕城既公仔，原來呢三隻野手腳都可以拉長，好勁架﹗原本想夾多幾隻比細佬，但係冇機會返啅﹗Day 3：
 一早爬起身去新宿京王酒店坐車去白樺湖，原本米雪話5條友坐的士會平啲，但係陳小姐話要去買麵飽食，最後就坐咗JR，但呢個選揀，簡直係呢個旅程最錯既一件事，5條人攬住袋行理，足足急步行咗20分鐘先到，個個行到死咁滯，好彩早咗好多出門日，唔係都唔洗旨意去趕到架車﹗去到竟然比我發現架旅遊巴個車牌，係我既幸運號碼「666」，真係邪﹗上到車，我即時食我最愛既溫泉蛋，上次食唔到，今次終於一野就比我買到，除咗好味，我都唔知點形容﹗ 坐足 3個鐘頭既巴士，終於去到白樺湖，本人之前冇聽過呢個地方，只係知鄉下同浸溫泉，所以對呢個地方冇乜期望，但係完全出乎我意料之外。離開咗東京，大家既腳步都放慢咗好多，食飽午飯之後，就坐吊車上半山，沿途花香撲鼻，感覺真係好舒服。 之後，仙蒂就舉腳話要去剪影館，亦都係佢此行既主要目的，一班人就慢慢散步去距離15分鐘既剪影館。雖然白樺湖係一個鄉下地方，但呢個剪影館的確令人嘆為觀止，裡面既藝術品一個字「勁」，雖然只係用紙剪成，但立體得來又有曾次，真係好厲害，我地個個都拿住部相機勁影，諗住返嚟做Wallpaper，哈哈﹗ 剪影館裡面，最令人留戀既，就係有一間圓形房，圍繞住間房既，就係以春夏秋冬為題材既剪影﹗每一幅都靚到爆，連天花都有，我地幾經辛苦死試爛試先搵到個好位影相留念，不過本人部機仔真係好唔聽話，剛剛影完張大合照就冇電﹗都唔知好嬲定好笑﹗ 睇完剪影館，然後就行返酒店準備食晚飯，唔知係咪個人心情放鬆，所以路上見到既一花一草，都好似向住你笑咁，睇到佢都開心呀﹗去到食自助餐既地方，簡直唔敢相信自己隻眼睛，嘩，咁多野食既，壽司、串燒、沙律、魚生、雪糕，總之講得出都有，最緊要係有無窮無盡既長腳蟹響度等緊我地，仲要係好好味呀﹗最後，食到五條友都捧住個肚，於是就拿住包響東京買既煙花嚟玩，呢包煙花最奧妙之處就係個 Kitty 3D 眼鏡，只要一有燈或者火光，一戴咗個眼鏡，全部都會變晒 Hello Kitty 頭，好恐怖呀﹗但因為負責影相條友死都唔肯比返D相我，所以比我唔到大家睇。燒完煙花，休息咗好一段時間就走咗落去浸溫泉，最好玩就係有室內同露天，總共有3個泉比我地慢慢玩，本人都係第一次浸露天溫泉，真係好好玩喎，浸完熱辣辣既溫泉，又跳落凍冰冰既溫泉裡面，簡直人都顛，同時亦消除咗先兩日既所有疲累﹗
Day 4：
  一早食完早餐，原本想再去溫泉浸多轉，點知人地就冇開，最後又去咗夾公仔，我發覺我地真係顛顛地，幾條友響個鄉下地方，夾咗幾十隻公仔走﹗而我就總共夾咗三套十五隻哨牙仔扮「神勇飛鷹俠」既公仔走，除咗變態，都諗唔到有乜形容詞嚟形容我地幾個﹗食完午飯，就坐返 3 粒鐘車去東京，響架車上面當然係瞓覺，途中亦都經過一個叫霧ケ峰既地方，比大家買下手信，我地幾條友就好似港燦落到車就係買雪糕同粟米食，之後又周圍影下相，不知幾滋陰﹗ 返到東京，當然繼續博殺，響鄉下地方由於滿載而歸既關係，所以要將所有行李放入Locker先得，響高島屋行咗一圈，我同明仔都決定放棄，將所有氣力都留返聽日「決戰裏原宿」，於是米雪一個人不斷行不斷行，我同明仔就坐埋一邊歎咖啡。原本諗住食多晚豬扒飯，但又突然諗起冇食過拉麵，於是就拎住幾大袋行李，走咗去歌舞伎町，搵傳聞最好食既博多天神，搵咗幾十分鐘後，終於搵到，而老闆精通多國語言之外，亦好識做，特登叫我地比部相機佢，佢幫我地影合照﹗哈﹗由於大家都太攰既關係，最後我地又夾咗一陣公仔，最好笑係明仔無意間用100日元，夾咗個喇叭返嚟，佢真係笑到收唔到聲呀﹗最後，就安心坐的士返酒店瞓覺覺﹗Day 5：
 話明今日係「決戰裏原宿」，當然不容有失，12 點就到去我最愛既 Headporter，好彩唔洗排隊，死爭爛爭，揀到流晒汗，買咗幾個袋走，Headporter既特式就係嗰班黑面Sales，無論你係咩人佢都係要黑面，真係有性格﹗買完Headporter，就走咗過對面既Headporter Plus睇衫，好衰唔衰又比我睇到件褸好鬼靚，仲要半價 1000蚊，抵到爛，買﹗第二站，就係 Ape神殿，九曲十三彎，行到老鍊咁遠先到，唔怪得上次我地搵極都買搵唔到啦﹗原本只係幫細佬嚟朝聖，但最後自己都買返件嚟潮下﹗ 原本我要買既野就只係咁多，可以數手，但係無端端又比我地發現Ape隔離有間 Y3，所以就貢咗入去睇，一入去睇就 PK，最後就買咗隻 1700蚊既皮波鞋，係我人生裡面最貴既一對鞋同一條400蚊既皮帶，最谷氣係返到香港發現對鞋有得賣，仲減到 1200，條皮帶就兩舊，我睇到之後即時想搵人打呀﹗之後，米雪同另外兩位團友去咗行老佛爺，我同明仔又去歎咖啡，一邊飲，一邊諗起個新袋好易污漕，所以諗翻啅Headporter買個袋仔裝住D「淋嬸」野，打比細佬，佢又話要多幾年袁人，於是我同明仔就用極速趕及閂門前翻啅Ape神殿，買完我又一條友入返裏原宿翻啅Headporter，行完之後，兩隻腳都起晒水泡，亦都將身上所有錢都用清光﹗變成一個爛腳奴隸﹗ 夜晚返到酒店，佢地仲話要去燒煙花，爛腳既我真係冇乜性趣，最後就比佢地迫咗落去做攝影師﹗佢地真係夠薑，走到去酒店附近一個廣場度放，仲要響人地既術藝品旁邊起壇，成班好似道友一樣，點起蠟燭，你話佢地響度做咩呀﹗而當日因為係星期六既關係，所以極之多人，幾十對眼就望住呢幾條白痴響度顛，真係好笑﹗Day 6：
最後一日，米雪當然唔放過呢個機會，一早就仆落西武行，我就好好彩搵到光頭爸爸要搵既陳年高達，唔係都唔知點交差﹗當米雪退稅既時候，又比我發現間Beams，入到去又買咗三件衫，呢一刻我真係可以宣佈破產﹗
 去到機場Check in完之後，就坐車去 2 號機場同明仔及米雪食飯，原本已經計好晒時間，6點前過返去就冇問題，點知好很多人過關，本人排著條隊慢到嘔，隔離做三個，個阿伯先做到一個，望住隻表時間一分一分咁過去，飛機6點50分起飛，6點40分我仲排緊隊，仲要坐無人駕駛，點算呢，心諗今次死梗，唔通要留響日本？一過完關，我就即時喪跑，好彩都唔係太遠，起飛前5分鐘及時趕到，真係真係好彩﹗ 上到機，機長廣播話7點20分左右會遇到氣流，叫大家避免呢段時間去洗手間，令到我心情梗係緊張，氣流﹗係咪成架飛機D野會反轉晒架﹗到咗 7 點20分，的確有氣流出現，不過就唔係我想像中咁嚴重，我可以放心食我個飛機餐﹗順利返到香港，又唔知咩原因，兩班機既行李一齊出 ，等咗半粒鍾先等到我件行李出嚟，電話又就快冇電，幾驚同響出面接我既細佬失去聯絡，最後都安然無恙﹗真係要感謝上天﹗ July 15 好 X 激氣原本已經瞓咗落床，但係因為今日發生咗一件事太過激氣既關係，搞到我瞓唔著，條氣越諗越唔順。
話說本人今日同輝朱去咗太古廣場諗住SHOPPING，點知一泊好車，就響西武下面間超級市場見到有影，我地就入去影咗幾張相，然後又響超市出面影返入去，我影影下，突然一條死鬼佬兇神惡殺響我前面走出嚟，係咁同我講英文，呢D咁既環境梗係扮唔識聽，係咁同佢講中文，係咁話唔知佢講乜，然後較腳，點知條死鬼佬欄住我唔比我走，仲打電話CALL人咁既勢，說時遲那時快，輝朱原來又黃咗，比超市裡面既人趕，然後我同輝朱，同條死鬼佬及超級市場裡面既人糾纏咗一陣，條死鬼佬仲扯住輝朱個袋唔比佢走，我地即時喝住佢，叫佢放手，然後坐電梯走人。
但係條死鬼佬都未有放棄，上地面搵食蕉，同個食蕉投訴，點知個食蕉唔鬼理佢，我地見到咁既情況當然即時分頭走，我走到二樓，就發現超級市場條PK跟住我，我就同佢講：「嘩，我好驚囉，無端端有人跟住我，我而家要報警﹗」條友以為我吹水，就同我講：「你報囉﹗」我帶佢遊咗個花園之後，條死鬼佬又趕到，好彩呢個時候，輝朱真係搵到兩個差人叔叔，我跑到差人叔叔面前，我即時扮晒野話好驚， 無端端幾條友係咁跟住我，條死鬼佬就同其中一個差人講發生乜事，而我同輝朱就同另一個差人叔叔講咩事，此時我先發現跟住我超級市場嗰條PK已經較腳，真係冇很用﹗
 差人叔叔面前，我地當然同佢講道理啦，係咁話個鬼佬郁手郁腳，不過呢個都係事實，條死鬼佬又白痴，響差人叔叔面前話自己有扯輝朱個袋，仲要屈我地，話我地影人裙底，我地以表清白，就比咗差人叔叔睇剛才影既相，差人叔叔明知我地係記者，又比埋相佢睇，當然好幫我地，佢仲教埋我地下次再有咁既情況記得咋死﹗真係唔話得。 差人叔叔打發完條死鬼佬之後，我地就繼續做野，做到咁上下，諗住落返間死人超級市場買罐汽水飲，點知一踏入間超級市場，就比個死鬼佬欄住，輝朱同我即時比個死鬼佬趕返出嚟，旁邊所有唔知發生咩事既店員既時 O 晒咀，我可以講，嗰下輝朱真係好冇事，原本我想拎枝閃燈出嚟，閃到條PK盲為止，不過玩得太串咗第二時好難做野，條氣最唔順係，一：佢根本唔係食蕉就響度扮食蕉。二：佢只不過係間爛鬼餐廳入面一條死鬼佬，冇權趕我地出超級市場。為咗呢件事，本人條氣極之唔順，瞓都瞓唔到，而家本人正諗緊用咩方法對付條死鬼佬，大家有乜好提議唔該比下意見﹗激氣人上 July 01 打回原形屈咗一日唔開心既情緒，今日終於釋放咗出嚟，我只可以比自己一個字「爆」，爆到連自己都唔知自己點解會咁「興」﹗「興」係因為咩呢？因為態度問題？係因為尊重問題？定係係因為......太多太多不滿一次過發出來，總之嗰一刻「興」到乜野都唔想講，乜野都唔想聽，包括任何人既電話......，我知道我一聽咗個電話，我一定會忍唔住不停勁鬧，我唔想因為自己興嗰一刻講咗一D說話而傷到任何人，令到任何人有唔好既感覺，已經錯過一次，我唔想再錯第二次，所以，嗰一刻我只係想靜下，唔想聽，唔想諗，唔想講。只可以同比我「爆」親既人講聲唔好意思﹗
呢種「爆」既感覺，直到我見到大師阿 Ken，我就開始平靜落嚟，我冇乜特別野同佢講過，但係我感覺到我既心情慢慢咁平伏下來，此時，電話就收到一個msg，係某人叫我唔好嬲佢﹗我回覆佢既係：「冇事﹗」嗰一刻我響度諗，嬲？我嬲乜呀？嬲佢？嬲自己？定係嬲其他人？我都唔知道，可能全部都有關係﹗但係我從來嬲人都唔會嬲得耐，因為到現階段為止，冇人一個人值得我去嬲，冇一個人值得我花氣力去嬲﹗
收完呢個msg之後，我一邊食野，一邊諗，我又好似打回原形一樣，好似返返去兩年前，不過而家比以前嚟得更加突然，更加激，完全冇先兆，但爆完之後就會好平靜，就好似煙花一樣，一爆完，一切都回復平靜，而家我感覺到無比既寧靜。
 溫完書，同學畀咗一張咭我，其係係塔羅牌既咭，叫我畫一D自己既意念入去，然後比佢地交功課﹗話明意念，又點會劃到出嚟，我揸住張咭諗咗一陣，最後就劃咗一個圓圈，裡面有D數字，好似時鐘一樣，不過D數字有D唔同，一路劃，一路諗到好多野，劃完之後，同學問我有咩意思，我講下講下，的而且確講咗一D諗法出嚟，雖然每張塔羅牌都有當中既意思響裡面，但最重要都係你睇到D咩﹗What Do U Get？What Do U Feel？劃完呢張咭之後，我既情緒真真正正抒發咗出嚟，有D野，唔可以睇表面。 June 30 你今日過成點呀？剛剛聽到收音機，節目主持芝See菇Bi 問左一句：「你今日過成點呀？」我突然間醒一醒，心裡面即時既答案係：「唔好，好唔好﹗」實際上，今日冇乜大事大生，但係就好多好多少少唔順利既野﹗即時令到我又情緒低落，負能量充斥住我成個人，唔開心，唔想講野，一句都唔想講﹗我自己都控制唔到﹗
夜晚收到個電話，電話中人同我講「飲到好醉，又做錯事......﹗」然後問我點算好，心情唔係咁好既我都唔知點答佢，細問之下，係未有咩錯事發生，只好叫佢試下拒絕人地﹗最後個結果係點，都要睇佢自己做化，我只會覺得日頭講完話唔會做......，夜晚又打回原形......，之後，我都唔知點繼續聽佢講野。人就係咁，永遠口講既，同做既都係兩回事，好既係，佢知道自己做錯，總好過覺得自己冇問題。
我知道拒絕人的確係一件好難既事，我會覺得拒絕唔到，就要去學下自己控制自己，「控制自己」我諗係一個好大既課題，點先可以控制到自己呢﹗平日做野，我都可以控制得到自己，但係情緒，真係好難控制，開心就笑，唔開心就黑面，唔出聲，我學唔到有D人明明唔鍾意你，都可以對住你笑面迎人，雖然有D人會覺得咁樣係叫識做人，但我學到今日都未學得到﹗
每次唔開心，我都會睇下奧修比到我咩啟示，睇完我諗我又明白咗一D野：
如果你試著想要成為不是你的樣子，你將會把自己綑綁住。
如果你不想要陷入麻煩中，那麼最好的方法就是保持單純。
當一個有耐心的子宮，讓存在誕生出存在要的樣子。
真正的開展緩慢且穩固的。
如果有一隻牛行為舉止像隻兔子就真的很不正常了。
初初睇呢篇文，我都唔係好明當中既意思，但係一路寫個Blog，潛意識讓我寫出好多好多心裡面想講既野，寫寫下，好似有D啟發，尤其係最後一句，原來係叫我唔扮野做自己﹗開心就笑，唔開心就唔出聲，有時想改既野，改完，未必會係好，有時勉強冇幸福，一切順其自然已經足夠﹗
近年，每次同朋友傾偈，當人地問到我意見時，我都唔係太想回答，因為呢個世界太多人會受人地既說話影響（其實係催眠），自己睇野仍然未算好透，未能夠睇到件事既全面，如果稍一講錯，人地聽咗，我會極之過意唔去，我唔想因為自己一句說話而老點人地，總之，什麼話題都係小講為妙﹗ June 27 39 c @ 淺水灣 繼上個星期淺水灣下水禮之後，今日我同Dnaiel仔同輝爺又再次出擊﹗多得秋鳳既畀面，唔洗Daniel仔開早，完全成全咗我地既好事，所以我地又晨咁早又去到淺水灣，今次輪到Daniel仔揸車，坐住架畀人超快感既芒果露筍入去，簡直正呀﹗快到差 D 連周圍有 D 乜都睇唔到﹗由於我地三個話明要輪流揸車既關係，所以下次應該輪到我......唔知走唔走得甩呢﹗ 今日比起上次熱咗好多，剛剛開始甩皮既我，一落水即時起晒水泡，完全核突到爆，曬咗一陣已經成身滾晒，跟手望一望沙灘個溫度計，唔望由自可，一望真係嚇咗一跳，39度？我有冇睇錯呀，痴線，唔中暑真係偷笑，所以我今日不停落水，不停游完又游，完全達到降溫同減肥既效果，雖然今日個太陽勁曬，但係我地三條友又好似若無其事咁，仲繼續勁曬三粒鐘，完全痴咗線，最後當然只有悲慘收場﹗加上今日著咗件唔同既泳衣，而家背脊既永衣印完全花到七彩，真係恐怖﹗亦足以可以顯示到今日又再一次咁曬黑咗。 就係後面兩邊膊頭都又紅又腫，在趙啷啷極力推介下，用咗兩舊水買咗枝「 Buy噢平」for曬完太陽後用既潤膚Cream，因為咁痛既關係，貴都冇計﹗今晚做野做到十二點幾，由於熱到爆兼周身痕既關係，返到屋企第一時間沖涼，跟手即時拎枝貴野嚟用，不過隻手都仲係勁甩皮，真係好很核突﹗個膊頭尤其犀利，只要掃一掃即時痛到爆，下次都係唔好去得咁盡，今日留一線、他朝好相見﹗ June 23 06下水禮 @ 淺水灣 日前，同一個6月星日既朋友去咗打邊爐，我一見到壽星仔戴咗一隻近 10 萬既金鋼「地通拿」出嚟，我地呢 D Cheap精當然唔執輸，好唔要面咁叫佢除隻錶出嚟比我戴下，佢二話不說就將呢隻錶遞比我，我戴上手之後，真係唔係咁想除返比佢，為咗令自己更加努力賺錢，馬上將呢一刻拍低，我都好希望我會有買到呢隻錶既一日﹗我得架﹗ 跑步跑咗三日就停咗，唔係因為我懶，而係日前同Daniel仔及輝爺去咗淺水灣游水，嗰日我地約咗早上 10 點出發，去到淺水灣陽光普照，不知幾開心，已經成年冇去過海灘，亦都係今年既下水禮，一見到個海，我真係好想去滑浪，但可惜梁居士就話本人今年唔可以玩高危活動，包括係滑浪，比人嚇咗三年，三年都冇滑過浪，嗰種心情真係難以形容，所以今年都只係可以游水同遊船河，慘慘慘。 嗰日有條某李話唔比帶相機，我睬佢都傻，最後影得最多相都係嗰位先生，激死，不過因為私隱既關係，唔可以Post D相比大家睇，但我呢位Snap Shot怪，天氣咁好當然唔會放過呢個影相既機會，原本見到幾個鬼妹著住 T Back 泳衣，但係掛住望都唔記得影， 因為Daniel仔太想曬太陽既關係，我同輝爺只好陪佢繼續曬，唔曬由自可，一曬著咗火﹗返到屋企沖涼時，隻腳開始發滾，然後到膊頭，到今日都仲係又紅又腫，一接觸陽光完全係痛到爆，可以話係見光死﹗因為輝爺星期日去完垂釣已經曬到黑晒，加埋當日既猛烈太陽，佢完全係燶咗，我係講真，真係燶咗，我諗同班賓仔冇乜分別。本人亦得到輝爺批准，公開佢既肉照比大家欣賞，大家睇完會唔會覺得想嘔呢﹗ 雖然曬到咁辛苦，但係噚日因為工作關係，都開咗沙灘更，全程都係老點兩個同事去行，因為我知曬多一曬我都會死人，兜兜下，就去咗炮台望一望，嗰度風景，真係十年如一，都一樣係咁靚，加上噚日天氣咁好，就更加靚﹗當時就快日落，蔚藍既天，雪白既雲，個太陽隱約響棵大樹度照射出光芒，呢下真係冇得頂﹗人間仙境...... June 17 Inner Healer呢一個星期真係令到我好攰，一個星期去咗三次 K ，不過都係冇乜認真咁唱過，搞到我要日日響架車度開「忌安演唱會」，歌聲咁動聽有乜所謂呀 ha ha ha﹗因為去咗好多晚夜街既關係，搞到日日都唔夠瞓，塊面既暗瘡印整極都唔退，做咗一個星期 Mask 都叫做好咗少少，睇嚟真係要休息多D。同時我又覺得自己真係冇乜運動，所以噚日朝早就死咗落街跑步，只係跑咗兩個圈已經知唔可以再跑，亦都唔可以去到咁盡，因為仲要開工，正如我所料，今日兩條腿都攰到爆，不過跑完返屋企照下鏡，發現塊面紅卜卜，我已經好耐冇見過自己面紅，嗰下真係覺得平日太少運動，所以身子咁差，正因為呢個原故，我會繼續努力，希望每一日都可以落街跑一跑，雖然跑得兩個圈，都好過冇﹗
呢排心情叫做好咗好多，最主要係好妹妹件事已經搞掂咗，佢已經同佢好朋友和好如初，日前好妹妹同我講咗句：「差你咋﹗」聽完之後我即時：「哈﹗算吧啦﹗」呢句說話真係唔係發晦氣，而係真係覺得算，江山易改，本性難移，好難先可以改變到一個人，我唔會特別唔睬人，亦都唔會嬲，因為佢唔係真係錯，呢個只係佢既行為，冇野好嬲﹗或者有 D 心裡面既諗法影響，令到我覺得隨緣啦，好多野唔可以勉強，做朋友都係一樣。
 呢件事響我心入面的確只係佔住一個少少既位置，對我冇乜特別影響，而家每一日我都會攞住部相機四圍影，每次見到D相都好開心，因為部機影既相真係好靚呀﹗﹗﹗除咗Snap Shot 之外，我身邊既好同事亦成為我既攝影對像，佢地成日都整埋好多古怪表情，睇到都忍唔住笑出嚟﹗haha，做人開心D係好既﹗
今日好徹底咁聽朋友講咗一段遭遇，其實係艷遇，亦幫佢食咗隻「死貓」，查實都唔可以講係「死貓」，因為係響我同意下去啃，當得佢係朋友，梗係想幫佢擺平件事，我會覺得冇乜所謂，幫到咪幫囉﹗不過我就分析晒成件事佢聽，條路點行係佢自己揀，最緊要唔好做 D 令自己後悔既野啫﹗雖然其他人會覺得佢咁做會冇問題，至少會比人覺得我對佢有意思﹗有呢個諗法都好正常，亦都係響我個位去諗，不過我又覺得冇乜問題，都唔係第一次咁比人懷疑，人既口要講既野，講極都講唔完，我真係聽唔晒，亦都理唔到咁多，只要我唔係就得啦﹗做人都係要為自己，都唔係為其他人﹗不過我都好開心，有一個人願意將咁多「秘密」話比我知，可能係一個全世界都知既秘密，但係......
我一向都好鍾意聽人講野，尤其係返咗學之後，好希望響我既能力之下，可以幫到身邊既朋友，因為我個守護天使既天職係 Healing 嘛﹗加上響每一件事上面，我都會學到 D 野，今次呢件事令到我覺得「男人真係信唔過」，呢個信念，再次鞏固起嚟。比人呃冇乜所謂，最緊要唔可以自己呃自己，連自己都同呃自己的確係一件好悲慘既事。記得小學時，響同學既紀念冊上面寫：「靠山山會倒，靠人人會變，靠自己最為堅﹗」寫既時候完全知呢個句話想講乜，只不過人寫我又寫，但係活到今日，我終於明白到呢句意話背後既真正意思﹗ June 12 心情可以影響天氣呢幾日天氣好差，日日都橫風橫雨，前晚食飽飯，準備再開工，就遇上狂風大雨，為安全起建，就將車停咗響百德新街，大雨到連車都唔敢落，只係拿住部相機係咁影，無意中比我影到一張閃電時，成個天都光晒既一刻，的確係一個千載難逢既機會。唔知係咪就係呢一刻，喚醒咗某人同某人呢﹗
我經常都會因為落雨，又或者天氣唔好，心情都會跟住唔好，不過有人同我講過「心情可以影響天氣」，以前我會覺得冇可能，但而家我會覺得我可以做到。今日出到銅鑼灣，仍然大風大雨，不過，就比我遇到一個人，呢個人將車停響我旁邊，我地兩個開住窗傾偈，我地一邊傾，一邊拎住塊布響度抹車，場面極之好笑。起初大家都係講一D無聊野，但突然間佢竟然笑住問咗我一個好認真既問題，原本我唔想講，但比佢嚇一嚇，終於講咗出嚟，之後既對話，比我感覺到佢已經冇事，我見到佢個笑容，我真係覺得好開心，嗰一刻，我真係覺得「心情可以影響天氣」。
我地分別咗之後，天開始停雨，我見到我個「好妹妹」，佢話收到個電話，係佢個好朋友叫佢今晚一齊去睇波，即係佢地冇事啦，見到佢面上再次掛上那個不會停下來的笑容，好開心，係由心裡面發出來既開心，噚晚既願望，估唔到第二日就可以成真，太快喇，我有D覺得意外﹗可能呢 D 真係整定啦，我好感謝個天比我呢個機會，希望佢地呢個關係可以一直維持落去，直到永遠......。 June 11 OH CARD 真係令人 O 晒嘴﹗今日晨早爬咗起身同班同學溫書，仲要去到尖沙咀咁很遠，真係有少少唔願意，溫咗幾粒鐘，都叫做有 D 得着，都叫明白咗最溫嗰一課，希望可以過到骨啦﹗除咗考試希望過骨外，有另外一樣野我都好想可以過到骨，但係好似有 D 阻滯﹗
溫完書，兩位好同學又拎咗副 OH CARD 出來，我當然好願意做佢地既實驗品﹗我更加發覺副牌可以令人 O晒嘴，因為副牌完全係用自己既潛意識去解，所以都幾準，我諗咗一個問題，呢個係最近我好想好想快 D解決既野，但係我一睇就解咗第二樣野（雖然都算有關），原來溍意識話比我知，我心裡面最想解決既問題，係我同某人既關係﹗因為我知道，只要我解決咗呢個結，另一個結就會好易解。出咗張牌係兩個人，去到轉彎位停低咗，好明顯係講緊而家呢個情況，明明有彎轉，但係兩個都唔肯行，睇咗幾樣野，都係覺得要放低自己，將自己縮到最細，等等等等，又做細？唔係化﹗真係有 D 唔願意﹗但係最後所有辦法都唔得既時候，既唯一辦法﹗
之後，我又問咗其餘兩位朋友個關係，其實，呢個係我顯意識上面最想解決既問題，左問右問，發現一樣好絕既野，原來佢地之間，各人都手持一把間尺，冇錯，係間尺，即係話，佢地兩個各自心中都有把尺，簡稱兩個人「互度」﹗計住計住，「係你唔啱，你要同我認錯﹗」另外一個又係咁諗，等等鑽牛角尖既問題，鑽到各自去到兩個角落頭﹗佢地要經過一條橋，我覺得係一個「關口」，先可以見到彩虹（我最想見到既結果）。當問到我可以做 D 咩既時候，最好笑係我對住一個要用「錢」有關既野，將佢帶返出嚟，另一個就要用雙手捉住佢，帶佢返來，睇完都叫有 D 頭緒，我知我會做到架﹗努力呀﹗
諗來諗去，都係我唔好，做成呢個缺口，真係要同所有人衷心講聲「對唔住」，「解鈴還需繫鈴人」，我會盡我全力，去修補呢段關係，禍係我闖，我一定要去承擔，我心底裡面有個希望，就係響一個大日子之前，可以令到佢兩個和好如初，我既計劃已經進行中，雖然得返幾日，但係我會努力，趁呢幾日時間，去做D野，令到我個好「妹妹」以後每一日都可以好似以前咁開心﹗
TO：好妹妹
雖然你成日話唔在意呢個朋友，又話自己而家好開心，佢打嚟我冇野架，等等說話，但我知你個心唔係咁諗，因為你每一句說話，都出賣咗你啦，只係我費事踼爆你啫，你根本就係好愛佢﹗係咪？但我好希望唔好灰心住，唔好試圖去阻止我，一來你係阻唔到﹗二來，我真係好想做返少少野﹗唔該畀畀面﹗THX June 04 多口之過因為自己「多口」，令到 A 同 B 兩個好朋友鬧交，更令到自己同好朋友 C 鬧埋一份，因為自己「多口」，令到 4 個人唔開心，真係唔知有乜為，我都有嚐試去解呢個結，但係剪不斷，理還亂，我知道 B 好興，因為 A 將 D 秘密揚出街，而 C 就因為多口既關係無端端比我鬧咗餐仲興， A 就覺得自己好無辜，明明冇做過都比人老屈，所以超級唔開心。
我都好明白佢既心態，亦都安慰咗佢成晚，但係佢都仲係好唔開心，我可以點做呢？其實件事只不過好小事，但係就因為 4 個人各持己見，只不過因為一句說話搞到而家咁樣，其實 4 個都係超級細路仔脾氣，大家都太過執著，太過覺得自己先係啱嗰個，其實好多野都冇啱同錯，事關每件事至少都有兩面，響自己興既同時點解唔可以試下企響人地個立場睇下，其實大家只不過企響唔同既位啫﹗大乜大不了喎，唔洗因為D咁既事反面咁滯呀﹗雖然我瞓一覺已經乜事都唔記得，但係見到 B 仲唔開心，我都唔知道點樣解決，因為我係局中人，兼且......，邊個可以比 D 指示我呢﹗其實有 D 野，明明知都最好扮唔知，知道太多，對自己一點好處都沒有，有的，就只有壞處。
仲有三個星期就考試，雖然我諗住要考兩次，但係都要努力溫書，就算唔合格，至少唔洗出醜先﹗ June 01 一日死兩次噚晚輝朱打比我話好驚，因為佢睇住架車響東廊連飛四條線，然後自炒飛起再跌返落地，於是佢就話突然覺得自己生命每一日都受到威脅，因此強烈要求我換胎﹗ok，冇問題，有時間先得架大佬﹗雖然公司有幾條某李話我同佢似樣，好似兩姐弟，但本人真係完全唔覺囉﹗不過有樣野好邪，有時一D野大家既遭遇有D相似。
 今日雖然係公眾假期，但係都要開工，響呢D日子都好彩比我執到單野交差，總好過食白果響中環食完野就開車去灣仔，點知經過一條街的時候，有位阿伯突然響走出馬路，雖然我只係開得30/km，但當我見到佢既時候，架車已經到﹗在這個0.01秒之間，我即時踩了迫力，然後將呔盤向左扭，當車停定之後，那位阿伯就拍我架車，好似話比我知佢隻腳比我條呔壓住，嗰下我真係好驚，於是就意圖將車退後，點知阿伯就突然向我耍手，示意「唔洗喇﹗」於是我就開窗同佢講：「阿伯點呀，過馬路睇車啦﹗」當佢想開口話我的時候，平日唔會幫口既小平就出聲：「我睇住你個頭完全冇望過過嚟﹗」此時阿伯就無言以對，跟住話：「算啦﹗」然後示意我走，我就問佢：「你有冇事呀，大佬你有事我真係唔安樂﹗」佢答：「冇事，走啦﹗」我就伸個頭出窗，望一望佢隻腳冇流血，冇表面傷痕，我先放心開車走，但係開車既同時，我全身已經嚇到冇晒力，個心勁跳﹗夜晚過海，在隊道口見到架巴士讓我先行，我就踩油去，點知架死人小巴無端端 Cut 出嚟，我即時踩迫力，好彩停得切，真係咩都可以慳，迫力皮真係唔可以慳，如果唔係呢對迫力皮，我諗我今日已經死咗兩次，突然間諗起，可能呢幾日無端端心跳係比我一個警號啦﹗ |
|||||
夜晚過咗旺角做導遊，帶兩個台灣記者去飲飲食食同Shopping，然後就帶佢地去芒果怪話好好食既甜品屋「石磨坊」食芒果冰，呢個圓錐體既芒果冰真係有D料到，個賣相已經夠煞，再加埋裡面又有我最愛既涼粉，真係正到爆﹗不過就甜咗少少，原本話要減肥既我，又要將計劃押後一天﹗我幾時變咗姐姐架？點解我唔知既﹗
Send a private message
Subscribe to RSS feed
Tell a friend
Add to My MSN
Add to your network
Sign up for alerts|
|
